Söngur Sólveigar

Ég vona að mér fyrirgefist að ota mínum tota örlítið en perónulega fannst mér þetta vera besta söngatriðið.

Fleiri áhugaverðar myndir

Hér kemur enn ein skemmtileg mynd. Þessi er af gestgjöfunum, Kristínu, Dillu og Sellu, og Möggu. Hinar myndirnar frá Syðri-Brekkum eru hér. Takið eftir að ég er búin að bæta myndum við gamlar færslur.

Sætúnsfjaran - myndir

Ég er afskaplega hrifin af mörgum af myndunum sem voru teknar í Sætúnsfjörunni og er þetta bara ein þeirra. Hinar eru hér.

Skemmtilegar myndir

Mig langar hér í nokkrum færslum að benda á nokkrar skemmtilegar myndir sem eru í myndasafninu. Hér kemur ein, hún er tekin á Sauðanesi en hinar myndirnar þaðan eru hér.

Hópurinn á Hallgilsstöðum

Begga tók þessa flottu mynd af hópnum fyrir utan Hallgilsstaðabæinn. Eins og sjá má er veðrið hreint afbragð, allir frekar votir og vottar fyrir dropa á linsunni! Fleiri Hallgilsstaðamyndir eru hér.

Myndvinnsla í fullum gangi

Það gengur nú samt frekar hægt. Allar myndir sem ég hef fengið eru hér en ég á eftir að fá myndir frá Gumma og Helga. Núna er ég aðallega að brasa við að koma því sem við tókum á vídeóvélina yfir á eitthvert form sem hentar á diskinn. Þetta þarfnast einhverra lagfæringa og ég hef ekki nokkurt vit á því sem ég er að gera!

Myndir frá Eiði

Hér getið þið séð myndirnar sem voru teknar á Eiði. Það vantar enn eitthvað af myndum og eins á eftir að fara í gegn um þetta, endurraða og snyrta eitthvað. Það gengur hins vegar frekar hægt að hlaða þessu inn - en það kemur.

Myndir

Ég er heldur á eftir áætlun með efni inn á síðuna en nú hef ég hlaðið inn myndum sem við tókum á Ytra-Lóni, þar sem við gistum flest. Myndirnar eru hér.

Að liðnu ættarmóti

Nú er fólk farið að tínast heim eftir vel heppnað ættarmót. Langanesið tjaldaði því sem til er, brim og rigning, alveg eins og eftir pöntun. Við hittumst við Ytra-Lón í gær og héldum út í Eiði, þaðan fór hluti af hópnum upp á Heiðarfjall en hinir í Sauðanes, þar sem allir hittust svo. Næst var haldið í fjöruna á Sætúni, síðan í Hallgilsstaði og að lokum í Syðri-Brekkur þar sem þær systur Kristín og Dilla og Sella mágkona þeirra tóku á móti okkur með kaffi og meðlæti. Í gærkvöld borðuðum við svo saman kúfisksúpu, grillaðar svína- og læmbasneiðar og súkkulaðiköku og hlustuðum á fólk segja sögur.

Frekari sögur koma síðar.

Tölur

Eftir því sem ég kemst næst mun hópurinn telja 35 manns, auk 5 gesta sem við höfum boðið að borða með okkur. Það er heldur færra en vonir stóðu til upphaflega en þetta er auðvitað langt ferðalag fyrir lang flesta og skiljanlegt að einhverjir heltist úr lestinni. Næst höfum við þetta meira miðsvæðis.

Þetta verður sennilega síðasta færsla fyrir ættarmót þannig að ég segi bara góða skemmtun og ég hlakka til að sjá ykkur.

Nýjasta veðurspá

"Norðan 3-8 m/s og skýjað, en úrkomulítið. Norðvestan 3-10 síðdegis, hvassast við ströndina, en rigning undir kvöld. Norðan og norðaustan 5-10 og úrkomuminna á morgun. Kólnandi, hiti 4 til 9 stig á morgun.
Spá gerð: 27.06.2008 06:24. Gildir til: 28.06.2008 18:00."

Tekið af vef Veðurstofunnar.

Það er vissara að hafa stígvélin, pollagallann og flíspeysuna með.

Hallgilsstaðir

Og að lokum, örlítið um Hallgilsstaði:

"Hallgilsstaðir eru forn lögbýlisjörð, var 18 hundraða jörð, víðlend, úthagar góðir, engin mikil og þótti jörðin með bestu heyskaparjörðum í hreppnum, torfrista næg, og stunga."

Sætún

Örlítið um Sætún:

"Árið 1936 reistu foreldrar okkar nýbýlið Sætún sem var stofnað úr landi Ytri-Brekkna. Hús jarðarinnar var byggt nálægt sjónum, norðan við landamerkjagarð sem ábúendur Ytri-Brekkna og Syðri-Brekkna gerðu skömmu eftir aldamótin 1900. Býlið fékk afmarkað 20 hektara eignarland, einnig fjörubeit og beitarréttindi fyrir eitt hundrað kindur á Brekknaheiði."

Veðurspáin

Textaspá fyrir Norðurland eystra:

Norðlæg átt, 3-8 m/s. Skýjað með köflum og skúrir á víð og dreif síðdegis, einkum til landsins. Hiti 8 til 14 stig. Norðvestan 3-10 síðdegis á morgun, hvassast við ströndina, kólnar og fer að rigna undir kvöld.
Spá gerð: 26.06.2008 12:22. Gildir til: 27.06.2008 18:00.

Á laugardag:
Norðlæg átt, 8-13 m/s um vestanvert landið, en annars hægari. Víða rigning með köflum og jafnvel slydda til fjalla, en lengst af þurrt og bjart veður SV-lands. Hiti 4 til 15 stig, hlýjast suðvestantil.

Á sunnudag:
Norðaustan 5-10 m/s. Rigning með köflum um mest allt land, en skúrir á Suður- og Suðvesturlandi. Hiti 4 til 13 stig, hlýjast suðvestantil.

Tekið af vef Veðurstofu Íslands.

Dagskrá laugardagsins, í grófum dráttum

Við ætlum að byrja á að fara út í Eiði. Einhverjar líkur eru á Eiðisþoku en er það ekki bara betra? Hittumst við afleggjarann á Ytra-Lóni klukkan 10. Síðan er meiningin að koma við á Sauðanesi, þar sem er starfrækt minjasafn og þeir sem vilja geta skoðað kirkjugarðinn og auk þess er kirkjan þess virði að skoða hana. Á Sauðanesi er starfrækt veitingasala þannig að fólk getur fengið sér hádegissnarl þar. Við stefnum að vera á Sauðanesi um 11. Eftir það liggur leiðin í Sætún og Hallgilsstaði og að lokum í Syðri-Brekkur, þar sem Kristín ætlar að taka á móti okkur.

Eftir þetta er frjáls tími, jafnvel leikir, við högum bara seglum eftir vindi, fram að kvöldmat.

Syðri-Brekkur

Úr niðjatalinu:

"Syðri-Brekkur voru að fornu mati 16 hundraða jörð. Bærinn stendur undir Brekknafjalli. Það er að vestan allbratt en ekki ýkjahátt. Töðugraslautir og bollar eru þar víða og mjög skjólgott. Tún var grasgefið og spratt snemma, naut þar skjóls og raka frá fjallinu, engjar nærtækar og jörðin talin sæmileg heyskaparjörð, úthagar nægir en útigangur lélegur, rekavon góð. Sama ættin hefur byggt Syðri-Brekkur síðan 1795."

Niðjatalið er komið út

Niðjatalið kom úr prentun í gær. Það lítur mjög vel út en ég hef ekki rýnt nákvæmlega í það. Ef það eru einhverjar villur í því, verða þær lagaðar fyrir næsta mót.

Þeir sem ekki verða á staðnum, en vilja kaupa niðjatal, geta lagt inn á mig pening og ég sendi þeim ritið.

Söngskráin er einnig tilbúin. Ég hef þegar rekist á eina villu, enda töluvert minna í hana lagt en niðjatalið. Vona að mér verði fyrirgefið það.

Eiði

"Eiði var að fornu mati 27 hundraða jörð. Bærinn stendur við Eiðisvík, norðan við allstórt og djúpt vatn, Eiðisvatn, sem liggur milli Naustans og Heiðar- og Hrollaugsstaðafjalla. Afrennsli er úr vatninu í sjó og gengur silungur í vatnið."

Við ætlum að heimsækja Eiði á laugardaginn, þessi fróðleikur og miklu meira er í niðjatalinu sem ég er að fara að sækja í prentsmiðjuna núna á eftir.

Veðrið

Veðurstofan segir þetta um helgarveðrið:

Á laugardag og sunnudag:
Norðlæg átt, yfirleitt 8-13 m/s og rigning með köflum, en lengst af þurrt og bjart veður SV-lands. Hiti 5 til 14 stig, hlýjast suðvestantil.

Ekkert mjög spennandi þannig að það má ekki gleyma flíspeysunni, pollagallanum og stígvélunum heima.

Sauðanes

Smá fróðleikur um Sauðanes og kirkjuna þar. Einnig á vef Langanesbyggðar.

Nammi namm

Ég minni á matseðilinn:

Forréttur: Kúffisksúpa borin fram með salati og brauði.
Aðalréttur: Grillaðar svína- og lambalærasneiðar með bökuðum kartöflum, salati og öðru meðlæti.
Eftirréttur: Frönsk súkkulaðikaka borin fram með rjóma, ís og ávöxtum.

Niðjatalið - aftur

Eins og áður segir er niðjatalið farið í prentun. Hins vegar verður gefinn út geisladiskur með aukaefni og meiningin er að á hann verði sett rafræn útgáfa af niðjatalinu þannig að það er hægt að bæta inn í það. Sá diskur verður ekki útbúinn fyrr en eftir mót þannig að við getum rætt hvað verður á honum um aðra helgi :)

Þetta verður veglegt rit - og diskurinn ekki af verri endanum heldur - og herlegheitin eiga að kosta tvöþúsund krónur. Einhver kom með þá hugmynd að greiða þetta fyrirfram og þar sem það myndi spara mér þó nokkra fyrirhöfn, þá samþykkti ég þá hugmynd og nú þegar eru tíu eintök seld! Ef þið viljið kaupa þetta fyrirfram, þá megið þið leggja inn á mig tvöþúsund krónur (og gjarnan láta senda mér tölvupóst í leiðinni) og ég færi það til bókar. Ef þið sem ekki getið komið viljið kaupa eintak, þá er það auðvitað velkomið líka, mér væri ánægja að senda þetta til ykkar.

Reikningsnúmerið sendi ég til ykkar í tölvupósti.

Niðjatalið

Nú er niðjatalið komið í prentun þannig að það verður ekki aftur snúið úr þessu. Vonandi verða allir ánægðir með það, ef ekki, þá verður það lagað næst. Bestu þakkir til allra sem aðstoðuðu mig við þetta verk, það eru þó nokkrir sem eiga eitthvað í því.

Þórshöfn

Á "útilegukortinu" er fróðleikur og myndir frá Þórshöfn.

Langanes

Mig langar að benda á smá fróðleik um Langanesið. Á vef Langanesbyggðar eru myndir og fróðleikur og einnig á vef Norðurleiða. Eftirfarandi fróðleikur er af Wikipediu.

"Langanes er stór skagi fyrir austan Þistilfjörð og norðan við Bakkaflóa. Skaginn teygist næstum 40 km út í hafið til norðausturs, allbreiður vestast en mjókkar út í örmjóan bjargtanga austast sem heitir Fontur. Framnes er sá hluti Langaness kallaður, sem er sunnan Þórshafnar, miðnes út að Eiðisskarði en utan þess útnes. Öll býli á útnesinu eru nú komin í eyði. Nesið hefur ávallt verið strjálbýlt, stærsta byggðin er sjávarþorpið Þórshöfn á vesturströndinni.

Lág fjöll og fell liggja norður eftir Langanesi, 200-400 m há og er austurhlutinn er miklu hálendari og undirlendi lítið. Gunnólfsvíkurfjall er hæsta fjallið, 719 m. Nálægt miðju nesinu er Eiðisskarð, sem sker fallgarðinn. Að norðanverðu er Langanes láglent og er breiðasta undirlendið frá Sauðanesi og út að Heiðarfjalli. Útnesið er víða grýtt og hrjóstrugt en að sunnanverðu er það betur gróið. Fjöllin eru úr móbergi að suðaustanverðu en að öðru leyti er nesið úr grágrýti. Láglendið skiptist að mestu í mýrar, grýtta mela og holt. Nokkrar sjaldgæfar jurtategundir vaxa á Langanesi svo sem flétta ein sem kallast klettakróða.

Mikið fuglalíf er á Langanesi, það eru einkum lundi, langvía, álka, teista, fýll og rita sem verpa þar í fuglabjörgum. Undir Skoruvíkurbjargi er klettadrangur, sem heitir Stórikarl og er þar eina súlubyggðin á þessum slóðum.

Bandaríkjaher rak ratsjárstöð á Heiðarfjalli 1954-68. Önnur ratsjárstöð á vegum NATO var reist á Gunnólfsvíkurfjalli 1989."

Styttist í ættarmótið

Nú styttist í ættarmótið, aðeins tæpar fjórar vikur þar til við hittumst. Vinna við niðjatalið er í fullum gangi, gagnaöflun langt komin og töluverður hópur fólks situr sveitt við að skanna inn myndir og skrifa texta, sem ég svo set inn í skjalið. Einnig er tilbúin (held ég örugglega) leikjadagskrá sem hægt verður að grípa til þegar við komum til baka úr skoðunarferðinni á laugardeginum.

Þann 30. maí fjölgaði í hópnum, þegar Önnu Helgu og Kára fæddist dóttir, 14 merkur og 50 cm ef ég man rétt. Hjartanlega til hamingju með dótturina, bæði tvö (sem og amman, afinn og aðrir sem telja sig eiga eitthvað í barninu :) ). Eins og margir vita fóru þær systur (Halldórsdætur) til London í byrjun apríl og gistu hjá Önnu og Kára í nokkrar nætur til að hita upp fyrir mótið, og áttu góða en frekar snjóuga daga hjá þeim. Anna Helga sendi mér myndir og gaf leyfi fyrir því að ég setti þær hér á síðuna.

Einhverjir hafa ekki enn ákveðið hvort þeir muni koma eða ekki en þangað til fólk afboðar sig, vonum við að það komi. Svo ef einhver hefur áhrif hjá veðurguðunum, má sá hinn sami reyna að semja um gott veður handa okkur.

Framvinda mála

Það er svo sem ekki mikið að frétta en "nefndin" (við Örn), hélt óformlegan fund á laugardaginn þegar Örn og fjölskylda kom við hjá mér og þáði kaffisopa milli skíðaæfinga í Hlíðarfjalli og sundferðar.

Nú hef ég fengið mest af þeim upplýsingum sem ég þarf frá fólki fyrir niðjatalið en þó er enn eitthvað eftir. Gummi hefur tekið að sér að setja saman æviágrip um ömmu og afa og safna myndum sem gæti verið gaman að hafa með í niðjatalinu. Ef þið hafið eitthvað sem þið teljið að eigi þar heima, þá endilega hafið samband við mig eða Gumma.

Við höfum, eins og áður kom fram, fengið leyfi til að koma í Syðri-Brekkur og Sætún og nú höfum við einnig fengið leyfi til að koma í Eiði og Hallgilsstaði. Mér skilst að það verði dúntaka í gangi á Eiði þannig að við þurfum að haga okkur í samræmi við það.

Það stefnir í góða þátttöku, 41 hefur gefið jákvætt svar, en einhverjir hafa enn ekki getað gefið svar, af ýmsum ástæðum og er það allt í góðu. Vonandi komast bara sem flestir á Langanesið þessa helgi :)

Heimsókn í Syðri-Brekkur

Eins og þið vitið langar okkur að heimsækja nokkra staði sem tengjast ömmu og afa, laugardaginn 28. júní. Í innleggi fyrir nokkru síðan (hugmynd að dagskrá) nefndum við Eiði, Sætún og Hallgilsstaði í því sambandi en Syðri-Brekkur komu fljótt til tals líka. Og í dag hringdi okkar yndislega frænka, Kristín Kristjánsdóttir á Syðri-Brekkum, í mig og spurði hvort við myndum hafa áhuga á að heimsækja Syðri-Brekkur og bauðst til að taka á móti okkur, sem ég auðvitað þáði.

Nú hafa 40 manns skráð sig á mótið. Gagnaöflun vegna niðjatalsins er í fullum gangi en einhverjir mega eiga von á hringingu frá annað hvort mér eða Erni fljótlega vegna þess :)

Efni í niðjatal

Gleðilega páska öll.

Nú langar mig til að biðla til ykkar um efni fyrir niðjatalið. Allur fróðleikur sem þið búið yfir er vel þeginn, hvort sem það eru myndir, sögur, minningar, pappírar eða bara hvað sem er. Okkur langar til að búa til eigulegt rit sem væri ekki bara niðjatal, heldur heimild um fólkið sem við erum komin af, uppruna þess og ævi, sem gaman yrði fyrir afkomendur okkar að lesa. Gummi hefur boðist til að vinna heilmikla vinnu í þessu sambandi og Þór ætlar að taka eitthvað saman líka. Það er afskaplega gaman að sjá hve mikinn áhuga fólk sýnir þessu verkefni og við hlökkum mikið til síðustu helgarinnar í júní.

Nýjar tölur

Núna erum við komin með 36 á skrá. Einhverjir koma kannski, það fer eftir því hvernig gengur að semja við nýjustu meðlimi ættarinnar. Það bættist lítil dama í hópinn í nótt þegar Hrafni Þór og Maríu fæddist dóttir. Stúlkan er 15 merkur og 51 sentimetri og heilsast móður og dóttur vel og Tryggvi stóri bróðir er ánægður með viðbótina. Við óskum þeim til hamingju og vonandi geta þau verið með okkur í sumar. Svipað gildir um Önnu Helgu og Kára en þau eiga von á sínu fyrsta barni í lok maí. Þau telja ekki útilokað að vera með okkur í sumar og væri frábært ef þau geta það.

Mæting

Nú hafa 27 skráð sig þannig að við erum að ná þeirri tölu sem við miðuðum við í upphafi. Við vonumst samt eftir fleirum en það, þetta eru u.þ.b. 75 manns í það heila.

Verð á kvöldverðinum

Aldurinn er kominn á hreint. Það er sem sagt 3.100 fyrir fullorðna, 1.550 fyrir 6-15 ára og frítt fyrir yngri en sex ára.

Þið munið...

...að skrá ykkur fyrir föstudaginn.

Góð byrjun

Núna hafa 22 skráð sig þannig að það gæti orðið slagur um að tryggja sér bestu gistinguna á Þórshöfn þessa helgi.

Hugmynd að dagskrá

Föstudagur 27. júní:

Ættarmótsgestir tínist á svæðið og komi sér fyrir.
Laugardagur 28. júní:
10.00-15.00. Skoðunarferð með rútu að Sætúni, Hallgilsstöðum, Eiði og e.t.v. fleiri stöðum.
18.00-??.??. Veisla, hlaðborð og uppákomur í íþróttahúsinu (ath. stutt frá skólanum) á Þórshöfn. Veisla í matsal og íþróttasalurinn opinn fyrir börn (og fullorðna) með takmarkað setuúthald.
Sunnudagur 29. júní:
Sundferð og ís áður en menn kveðjast og halda heim á leið.

Gistimöguleikar

Hótel Jórvík (s: 468 1400) hefur fjögur tveggja manna herbergi, herbergið kostar 6.900 nóttin, og eitt sem getur verið fjögra manna og kostar það 9.900 nóttin. Morgunmatur kostar 990. Þessi herbergi eru frátekin fyrir okkur út mánuðinn og ef einhver hefur áhuga, þá bara hringja og bóka og segja að það sé á mínum vegum (Birgittu).
Bændagisting á Ytra-Álandi (Bjarnveig s: 468 1290, 854 7390, 863 1290, netfang: ytra-aland@simnet.is). Þar er eftirfarandi í boði: Svefnpokapláss í 2 manna herbergi 2.500 á manninn + 900 morgunmatur, tveggja manna herbergi með baði og uppbúnum rúmum, 5.500 nóttin á mann, morgunmatur innifalinn og tveggja manna herbergi, uppbúið rúm, ekki sér bað, 4.200 nóttin á mann, morgunmatur innifalinn. Einnig er hægt að fá gistingu í skólanum á Svalbarði, þar er herbergi með tveimur rúmum, annað með þremur rúmum og svo eru 5 rúm í skólastofu. Örugglega hægt að semja um hagstæðara verð ef pantað er fyrir marga.
Farfuglaheimilið Ytra-Lóni (Mirjam s: 468 1242, netfang: ytralon@simnet.is). Það er reyndar eins og er bókað en gæti auðvitað losnað. Svefnpokapláss kostar 2.300 nóttin, tveggja manna herbergi kostar 6.000 nóttin og með uppbúnum rúmum kostar það 7.400 krónur nóttin.
Gistiheimilið Lyngholt (Karen s: 468 1239 og 897 5064, netfang: lyngholt@lyngholt.is). Það er bókað þessa helgi en ekki búið að staðfesta þá bókun og hún ætlar að láta mig vita ef það breytist. Læt vita af því síðar.
Svefnpokapláss í skólanum á Þórshöfn. Helgin kostar 1.500 á mann.

Veislumatseðillinn

Forréttur: Kúffisksúpa borin fram með salati og brauði eða grafinn lax borinn fram með ristuðu brauði og graflaxsósu.
Aðalréttur: Grillaðar svína/lambalærasneiðar með bökuðum kartöflum, salati og öðru meðlæti eða úrbeinað lambalæri, ofnsteikt með rauðvínssósu, bökuðum kartöflum, steiktu grænmeti og öðru meðlæti.
Eftirréttur: Frönsk súkkulaðikaka borin fram með rjóma, ís og ávöxtum.

Þetta kostar 3.100 á mann, krakkar 6-15 ára 1.550 og frítt fyrir yngri en sex ára.

Niðjamót á Langanesi 27.-29. júní 2008

Mér datt í hug að sniðugt væri að "blogga" um viðburðinn. Held að þetta sé ekki galin leið til að koma á framfæri upplýsingum.